अरुको मुद्दामा झुकिन्न |

एकजना बाक्लो जुँगा भएको मान्छे । कपाल सर्लक्कै माथितिर फर्काएका । अनि चस्मा लगाएका । बानेस्वर, संबिधानसभा भवनको अगाडी एक मान्छे आकाश हेरेका छन । हेरेका छन् । देख्नेहरु अचम्म भईरहेका छन् - यिनी के हेरीरहेका छन भनि । तर एक टक तिनी आकाशतिर हेरी नै रहेकाछन ।

आखिर तिनी के हेरीरहेका छन् ? वरिपरी मान्छे झुम्मिए । पहिचान भयो -उही चिर परिचित नेताजी जसले कुम हल्लाएको, जेल लगाएको, ब्याडमिन्टन खेलेको, नाचेको देखि ख्वाक्क खोकेकोले सम्म बिशेष अर्थ राख्छ राजनीतिमा । दशौ मिनेटदेखी एक टक आकाशमा हेरीरहेका छन् त किन अर्थ नराखोस । मान्छे थुप्रिए र धुइपत्ता त्यसको अर्थ खोज्न थाले । र मान्छेहरु उसैगरी आकाश हेर्न थाले । नयाँ देख्ने छक्क परे - "हैन के के हेरी रहेछन यसरी आकाशमा ? सोचे - " पक्कै पनि केहि हुनुपर्छ आकाशमा, नत्र यतिका मान्छे किन यसरी आकाश हेरेका हेर्यै गर्दथे ?" यसरी नयाँ मान्छे पनि आकाश हेर्नेमै सामेल हुन थाले । र मान्छे थपिएको थपियै ।

"बानेस्वरमा एउटा ठुलो भिड आकाश हेर्दैछ रे ।" खबर फैलियो शहर भरिनै । मिडियाहरु नि कुदे त्यतै तिर । धमाधाम ब्रेकिंग न्युज फ्ल्यास हुन थाले -

"काठमाडौको आकाशमा नयाँ रहस्यको उद्घाटन ।"

"अर्को ग्रहबाट यान आउन लागेको संकेत ।"

"संबिधान सभा माथीबाट आकाशबाणीको तयारी । व्यग्र प्रतीक्षा ।"

त्यहिँ मिसिन आएको भिडको पछिल्लो सदस्यले अघिल्लो सदस्यलाई सोध्यो -" खास कुरो के हो ? किन मान्छेहरु यसरी आकाश हेर्दै छन् ?"

"कुन्नि ! के थाहा ? सबैले यसरी नै आकाश हेरिरहेका रहेछन । केहि त होला नि भनेर मैले नि हेरेको केहि नि देखेको छैन अहिले सम्म ।" -अघिल्लोले भन्यो र उसको अघिल्लोलाई सोध्यो - " तपाइँ किन आकाश हेरिरहनुभएको छ ?" उसको अघिल्लोले भन्यो - "कुन्नी ! सप्पैले हेर्या भएर हेरेको, केहि देख्या होइन ।"

अघिल्लोले फेरी अघिल्लोलाई सोध्यो । अघिल्लोले अघिल्लोलाई । जवाफ केवल -"कुन्नी !"

'प्रश्न-कुन्नी', 'प्रश्न-कुन्नी' आकाश हेर्नेको भिडबाट भित्र छिर्दै गयो । अन्तत: नेताजी सम्म पुग्यो ।

नेताजीको पछिल्लोले नेताजीलाई भन्यो ।

-"यता हेर्नोस त ।"

नेताजीले भने

"किन किन ? मिल्दैन त्यता हेर्न ।"

पछिल्लोले सोध्यो

-"किन मिल्दैन ?"

नेताजीले भने

-"देख्नु भएन ? मैले टाउको माथी फर्काएको छु । "

पछिल्लोले सोध्यो ।

"टाउको किन माथी फर्काउनु भएको ? के हेर्नु भाको आकाशमा ? तारा गन्दै हुनुन्छ कि कसो ?"

नेताजीले भने

"तोडी म पागल हुँ र दिउसै तारा गन्नलाई ?"

पछिल्लोले भन्यो

"अनि किन आकाश हेर्दै हुनुहुन्छ त "

नेताजीले भने

- " हामी आकाश हेरिरहेको छैनम् । बरु निभिकताका साथ उभिएका छम् । संविधानसभामा अरु पार्टी ठुला भए । त्यसैले उनीहरुले हामीलाई आफ्ना एजेन्डामा झुकाउलान कि भन्ने आसंका छन् । हाम्रो गौरवशाली पार्टी कुनै पनि हालतमा उनीहरुको एजेन्डामा झुक्दैन । त्यसैले ठाडो गरेका हम । आकाश हेरेका, तारा गनेका होइनम ।