युवाका दिन

हामीकहाँ अचेल प्रसस्तै सुन्न पाइन्छ - बिरानो मुलुकमा पसिना चुहाउन किन जानुपर्यो ? गर्नेले यतै गरेका छन प्रगति । गर्नेलाई यतै छ अवसर आदी इत्यादी । के भन्या होला यो भनेर अचम्म लाग्थ्यो । यता जता हेर्यो युवाहरुले हैरानी देखि पाइएका देखिन्नथे । तै पनि गर्न सक्नेलाई यहीं छ अवसर भनेर चकित पार्थे । यि केवल हौस्याउन मात्र गरिएका कुरा जस्ता लाग्थे ।

तर गर्न सक्ने युवाको लागि यहिँ अवसर र प्रगति रहेछ भन्ने कुरा बल्ल थाहा हुन थालेको छ । किनकी यहाँका बलियाबाङ्गा युवाहरुले राज्य र राजनीतिक नेताको राम्रै धाप पाउन थालेका छन् । अब निर्धा, निर्बलिया सज्जन, इमान्दार बन्नेलाई कहाँको ठाउँ हुन्थ्यो ? ति जो बाँदरको पुच्छर लौरो न हतियार भै'गाछन । दलमा पनि के काम तिनको न कसैलाई थर्काउँन सक्छन न त चन्दा उठाउन । न त चुनावमा बुथ कब्जा गर्न सक्छन न त लाठिमुग्रीमा लाग्न सक्छन । त्यस्ता मान्छे राजनीतिमा कसरि बिक्नु ? अनि राजनीतिमै नबिकेकाहरु अन्त कसरि बिक्नु ? कतै नबिक्नेहरुका कुरा छाडौ । कुरा झिकौ बिक्नेका । ति बिक्छन जो सक्छन ।

हाम्रा राजनीतिक दलले सक्ने युवाहरुलाई प्रोत्साहन गर्ने नीति लिएको छ । ग्याङ फाइटमा पोख्तहरुको पार्टीको युवा संगठनमा उच्च डिमाण्ड हुन थालेको छ । धम्क्याउन सक्नेहरु सक्नेहरु सक्रिय कार्यकर्तामा पहिलो प्राथमिकतामा परेका छन् । पार्टीहरु गजबले समाबेशी हुन् थालेको छ । खुकुरी एक्सपोर्टहरु, टुटुल्को विशेषज्ञहरु, खुट्टा भंचुवाहरु , लठ्ठी मुग्रो हनुवाहरुलाई बिशेष आरक्षणको ब्यबस्था गरेर पार्टीको सुरक्षणको नीति पार्टीले लिन थालेको छ । यसले यस्ता विधामा बिशेषज्ञाता हासिल गरेका होनाहार युवाहरुलाई सुनौलो अवसर प्रदान गरेको छ । हप्ता उठाउनमा अनुभव हासिल गरेकाहरुलाई पार्टीमा ल्याएर चन्दा उठाउन लगाउन थालिएको छ । जसले गर्दा यस्ता बिज्ञ युवाहरुलाई आफुले सिकेको ज्ञानको भरपुर उपयोग गर्ने फराकिलो अवसर प्राप्त भएको छ । जसले गर्दा व्यक्ति र पार्टी दुबैलाई अर्थोपार्जनको अवसर मिलेको छ । यसले मुलुककै अर्थतन्त्रमा गतिलै योगदान दिने पक्का छ । पार्टीमा उनीहरुको प्रवेशले ठेक्कापट्टामा घुष लिने दिने काम बन्द भएको छ र धम्कीले नै काम चल्न थालेको छ । घुसलाई चन्दा र हप्ताले विस्तापित गरिदिएको छ ।

गोलि हानाहान गर्ने, खुकुरी जुधाई गर्ने, टाउको फोराफोर गर्नेलाई महान नेताबाट खेलाडीको उपादी प्राप्त भएको छ र त्यस्ता खेलाडीहरुलाई पार्टीमा ल्याएर राजनीति खेलाउने योजनाको कार्यान्वन सुरु भैसकेको छ । र यी खेलाडीले राजनीतिमा राम्रै प्रफरमेन्स पनि देखाउन थालेका छन् । जो फाट्टफुट्ट सभासद मन्त्री सम्म बन्न थालिसकेका छन् । र अव यस्ता उच्च पदमा यस्तै सक्षम युवाहरुलाई प्रोत्साहन गर्ने नीति महान नेताबाट सार्वाजैनिक भैसकेको छ । र गुण्डागर्दी पेसामा लागेर मुलुकको सेवा गरिरहेका युवाहरुलाई जिउदामा अवसर र प्रोत्साहन गर्ने मात्र होइन मरेपसी समेत सम्मान गर्ने चलनको समेत सुरुवात भैसकेको छ । यसो हेर्दा लाग्छ अब युवाको दिन आए ।